افغان ٹرانزٹ اشیا پر ڈیوٹی اور ٹیکس کو محفوظ بنانے کے لیے بینک گارنٹی کا نفاذ

کراچی(اسٹاف رپورٹر) وفاقی حکومت نے افغان ٹرانزٹ ٹریڈ کے ذریعے درآمدکئے جانے والے کنسائمنٹس کی اشیاءکے لیے بینک گارنٹی کا نیا نظام متعارف کرایا ہے جس سے کسٹمزسیکورٹی کو بڑھانے اورکسٹمزکے طریقہ کارکی تعمیل کو یقینی بنایاجاسکے۔اس سلسلے میںایف بی آرکی جانب سے ایس آراو1396جاری کیاگیاہے جس کا مقصدڈیوٹی وٹیکسزکی چوری کی روک تھام ہے ،مذکورہ ایس آراوکے مطابق بانڈڈ کیریئرز یا کسٹم ایجنٹ جو افغان ٹرانزٹ گڈز کے لیے گڈز ڈیکلریشن (جی ڈی) فائل کرنے کے ذمہ دار ہیں، اب کسٹم حکام کو بینک گارنٹی جمع کرانے کا پابند ہو گا۔ یہ بینک گارنٹی کسٹم سیکورٹی کے لیے ضامن کے طور پر کام کرے گی اور جی ڈی میں متعین لیوی ایبل ڈیوٹی اور ٹیکس کا احاطہ کرے گی۔ایس آراوکے مطابق نئے متعارف کرائے گئے ضوابط کے تحت، جی ڈی کسٹمز کمپیوٹرائزڈ سسٹم کے ذریعے یا ایک نامزد اسیسنگ آفیسر کے ذریعے کیا جائے گا،ایس آراوکے مطابق ایف بی آر نے یہ شرط عائد کی ہے کہ پاکستان میں مجاز کسٹم ایجنٹس، بروکرز، یا ٹرانسپورٹ آپریٹرز کو افغانستان کے لیے مطلوبہ سامان کے لیے بینک گارنٹی کی صورت میں مالی تحفظ فراہم کرنا چاہیے۔ افغان ٹرانزٹ ٹریڈ کے لئے جمع کروائی جانے والی بینک گارنٹیوں کی مدت ایک سال اوریہ گارنٹیاں پاکستان میں ان کیش کروائی جا سکیں۔ اوریہ بینک گارنٹیاں پاکستان اور افغانستان کے درمیان کسٹم ٹرانزٹ آپریشنز سے پیدا ہونے والی کسی بھی ذمہ داری کو پورا کرنے کی ضمانت کے طور پر کام کریں گے۔ٹرانزٹ آپریشنز کے لیے بینک گارنٹی کی مخصوص رقم کا تعین سسٹم کے ذریعے کیا جائے گا جس کی بنیاد پر کسٹمز کمپیوٹرائزڈ سسٹم یا روانگی کے دفتر میں تشخیص کرنے والے افسر کے ذریعے کیا گیا ہے اوریہ رقم درآمدی محصولات کو پورا کرنے کے لیے درکارہوگا۔ نامزد کسٹمز افسر اس بات کی تصدیق کرے گا کہ بینک گارنٹی ایک شیڈول بینک کی طرف سے جاری کی گئی ہے اور پاکستان میں ان کیش ایبل ہے۔ مزید برآں، وہ اس بات کو یقینی بنائیں گے کہ گارنٹی ٹرانزٹ میں سامان یا گاڑیوں سے متعلق ڈیوٹی اور ٹیکسوں کا درست تعین کرتی ہے۔ایسے معاملات میں جہاں ‘ایگزٹ اسٹیمپ’ کے ساتھ سرحد پار سرٹیفکیٹ موصول نہیں ہوتے ہیں یا گارنٹی میں بیان کردہ شرائط افغان درآمد کنندہ یا برآمد کنندہ کی طرف سے پوری نہیں ہوتی ہیں، روانگی کے مقام پر متعلقہ دفتر بینک گارنٹی کو نافذ کرنے یا ان کیش کرنے کے لیے کارروائی کرے گاتاکہ محصولات کی وصولی کی جاسکے۔افغان ٹرانزٹ سامان کے لیے بینک گارنٹی کا تعارف کسٹم سیکورٹی کو بڑھانے اور کسٹم کے طریقہ کار کی تعمیل کو یقینی بنانے میں ایک اہم قدم کی نمائندگی کرتا ہے۔ توقع ہے کہ اس اقدام سے ٹرانزٹ کے عمل کو ہموار کیا جائے گا اور حکومتی محصولات کو محفوظ بنایا جائے گا اور ساتھ ہی ساتھ پاکستان اور افغانستان کے درمیان تجارت کو بھی سہولت ملے گی۔