پاکستان نے ایرانی ٹرانسپورٹرز کے لیے بینک گارنٹی کو لازمی قرار دیا

کراچی (اسٹاف رپورٹر )پاکستان نے ایرانی ٹرانسپورٹرز کے لیے بینک گارنٹی کو لازمی قرار دیا ہے کہ وہ تفتان کے راستے نیشنل لاجسٹک کارپوریشن (این ایل سی) ڈرائی پورٹ کوئٹہ کو بھیجے جانے والے سامان پر عائد کسٹمز ڈیوٹی اور ٹیکس کے مساوی بینک گارنٹی فراہم کریں جبکہ خلاف ورزی کی صورت میں، بینک گارنٹی ضبط کر لی جائے گی، اور جرمانے سمیت اضافی قانونی کارروائیاں عمل میں لائی جائیں گی۔اس سلسلے میں ایف بی آرکی جانب سے بینک گارنٹی کو لازمی بنانے کے لیے کسٹمز رولز 2001 میں ترمیم کی گئی ہے، اور نئے ضابطے کو نافذ کرنے کے لیے باضابطہ طور پر ایس آراو1913جاری کردیاگیاہے ۔ایس آراوکے مطابق ترامیم 1987 کے پاکستان ایران دوطرفہ روڈ ٹرانسپورٹیشن کے معاہدے کے ساتھ کسٹمز رولز کو ہم آہنگ کرتی ہیں۔ نظرثانی شدہ قوانین کے تحت، تفتان سے درآمد شدہ سامان کو کوئٹہ کے این ایل سی ڈرائی پورٹ تک لے جانے والی ایرانی گاڑیوں کو کسٹم ڈیوٹی اور سامان پر عائد ٹیکسوں کے مساوی بینک گارنٹی جمع کرانی ہوگی، جیسا کہ تفتان کے کلکٹریٹ آف کسٹمز اپریزمنٹ نے طے کیا ہے۔ اگر ایرانی ٹرانسپورٹرز سامان کی درآمد کے لیے فراہم کردہ ٹرانس شپمنٹ کی سہولت کا غلط استعمال کرتے ہیں تو بینک گارنٹی ضبط کر لی جائے گی اور قانون کے مطابق جرمانے اور دیگر کارروائیاں کی جائیں گی۔ذرائع کے مطابق پاکستان اور ایران کے درمیان 1987 کا دو طرفہ روڈ ٹرانسپورٹیشن معاہدہ ابتدائی طور پر مسافروں کی نقل و حمل کے لیے قائم کیا گیا تھا لیکن بعد میں اس میں سامان کی نقل و حمل کو شامل کرنے کے لیے توسیع کی گئی۔ معاہدے کے مطابق ایران کو برآمدات لے جانے والی پاکستانی گاڑیوں کو میرجاویہ اور زاہدان تک جانے کی اجازت ہے، جب کہ ایرانی گاڑیاں جو مسافروں اور سامان کو پاکستان لے جاتی ہیں،ان کو تفتان اور کوئٹہ تک رسائی کی اجازت ہے۔ اس سے قبل ایرانی گاڑیاں صرف تفتان تک درآمدی سامان پہنچا سکتی تھیں جہاں ڈیوٹی اور ٹیکس ادا کیے جاتے تھے اور سرحد پر کلیئرنس کی جاتی تھی۔ تاہم، ایران طویل عرصے سے تفتان سے سامان لے جانے والی ایرانی گاڑیوں کو تفتان میں پروسیسنگ کرنے کے بجائے، کلیئرنس کے لیے براہ راست کوئٹہ جانے کی اجازت مانگ رہا ہے۔ذرائع نے بتایا کہ ایران نے مسلسل نوٹ کیا ہے کہ معاہدے کے تحت پاکستانی گاڑیوں کو میرجاوہ اور زاہدان تک رسائی دی گئی ہے، ایران نے پاکستانی گاڑیوں کو تہران اور دیگر علاقوں تک جانے کی اجازت بھی دی ہے۔ اس کے مقابلے میں پاکستان ایرانی گاڑیوں کو صرف تفتان تک محدود رکھتا ہے۔ ایرانی گاڑیوں کواین ایل سی ڈرائی پورٹ کوئٹہ تک رسائی کی اجازت دینے کا معاملہ ایرانی صدر کے دورہ پاکستان کے دوران ایرانی حکام نے اٹھایا تھا۔ایران نے یہ مسئلہ پاکستان کی وزارت خارجہ، وزارت تجارت، وزارت مواصلات اور دیگر متعلقہ وزارتوں کے ساتھ مسلسل اٹھایا ہے۔ ایرانی حکام نے اس حوالے سے ایف بی آر سے کئی ملاقاتیں بھی کی ہیں۔ اس کے نتیجے میں، تفتان سے این ایل سی ڈرائی پورٹ کوئٹہ تک ایرانی گاڑیوں کے ذریعے سامان کی نقل و حمل کو آسان بنانے کے لیے کسٹم رولز میں ترمیم کرنے کا فیصلہ کیا گیا ہے، جہاں سے سامان کسٹم کلیئرنس سے گزر سکتا ہے۔نظرثانی شدہ قوانین کے مطابق درآمدی سامان کی نقل و حمل کرنے والی ایرانی گاڑیوں کو اشیا پر ڈیوٹی اور ٹیکس کی مالیت کے برابر بینک گارنٹی جمع کروانے کی ضرورت ہوگی۔ مزید برآں، سامان کو سیل کر دیا جائے گا، اور نگرانی کے مقاصد کے لیے گاڑیوں پر ٹریکر ڈیوائسز نصب کی جائیں گی۔ این ایل سی ڈرائی پورٹ کوئٹہ پر کسٹمز کلیئرنس کا عمل مکمل کرنے والی گاڑیوں کی واپسی پر ان کی بینک گارنٹی جاری کی جائے گی۔