کسٹمزحکام کی سرپرستی میں اسمگلنگ کا دھندہ عروج پر، گاڑیاں نہ روکنے کے معاملات طے

کراچی(اسٹاف رپورٹر)کسٹمزحکام (انفورسمنٹ کلکٹریٹ )کی سرپرستی میں کراچی میں ہونے والی اسمگلنگ کا دھندہ عروج پر پہنچ گیاہے جبکہ اسمگلنگ میں استعمال ہونے والی گاڑیاں نہ روکنے کے معاملات بھی طے پاگئے ہیں جس کے بعد اب اسمگلنگ کا دھندہ کھلے عام کیاجائے گا۔تفصیلات کے مطابق ڈیزل ،ایرانی پروڈکٹ،چھالیہ اوردیگراشیاءکی اسمگلنگ کو نہ روکنے کے عوض 16کروڑروپے وصولی کی جاتی ہے اوریہ رقم چھالیہ کااسمگلرمبینہ طورپرکسٹمزافسران کو فراہم کرتاہے بعدازاں یہ تمام رقم اوپر تک کے افسران میں تقسیم کی جاتی ہے۔ذرائع کے مطابق حالیہ دودنوں کے انداریوسف گوٹھ ٹرمینل سے اسمگلنگ کا سامان لے جانے والی 150سے زائد گاڑیوں کا نہ روکنے کے لئے 6کروڑروپے ماہانہ کے معاملات طے پاگئے ہیں جس کے بعدوہ150سے زائدگاڑیاں جن پراسمگلنگ کا سامان کراچی شہرکے مختلف علاقوں منتقل کیاجائے گاان کو محکمہ کسٹمزکے افسران کی جانب سے نہیں روکاجائے گااوریہ تمام غیرقانونی دھندہ مبینہ طورپر کلکٹرپریونٹیوکی شہ پرکیاجارہاہے،اسمگلنگ میں استعمال ہونے والی گاڑیوں کی تفصیل نمبرکے ساتھ شائع کی جارہی ہیں جن کی انفورسمنٹ کلکٹریٹ کی جانب سے نہیں روکاجائے گا اوراسمگلنگ آرام سے کرنے دی جائے گی۔

واضح رہے کہ چیف کلکٹرانفورسمنٹ کہنے کوایک ایماندارآفیسرہیں لیکن اسمگلنگ کا کالادھندہ ان کی ناک کے نیچے ہورہاہے جوان کی ایمانداری پر ایک سوالیہ نشان ہے،ذرائع کے مطابق چیف کلکٹرانفورسمنٹ کواس کالے دھندے سے متعلق اطلاعات بھی فراہم کی گئیں تھیں لیکن ان کی جانب سے کسی قسم کی کوئی کارروائی عمل میں نہیں لائی گئی اوراسمگلنگ کا کالادھندہ بڑے زوروشورسے چل رہاہے جس سے قومی خزانے کو اربوں روپے کا نقصان پہنچایاجارہاہے اس سلسلے میں ارباب اختیارنے چپ سادرکھی ہے جو کہ انتہائی تشوس ناک ہے،ذرائع کاکہناہے کہ اسمگلنگ کے باعث مقامی انڈسٹریزاورٹیکس دہندگان شدیداضطراب کا شکارہیں اورسوچ رہے ہیں یاتوملک کو چھوڑدیاجائے یااس اسمگلنگ کے اس منظم دھندے کا حصہ بن کرقومی خزانے کو اربوں روپے کا چونالگاناشروع کردیں،محکمہ کسٹمزاوردیگرسیکورٹی اداروں کو اسمگلنگ سے متعلق تمام معلومات ہونے کے باوجودکوئی کارروائی عمل میں نہیں لائی جارہی جس سے اس امرکی تصدیق ہوتی ہے کہ ارباب اختیاراس کام میں برابرکے حصہ دارہیں لیکن اگران سے بات کی جائے توان سے زیادہ ایماندارکوئی شخص نہیں ہوتا۔اس سلسلے میں چیئرمین ایف بی آرعاصم احمد ممبرکسٹمزمکرم جاہ انصاری معاملے کی تحقیقات کرکے ملک دشمن عناصراوراسمگلنگ میں ملوث افسران کے خلاف محکمہ جاتی کارروائی کا آغازکیاجائے تاکہ اس ناسورسے ملک وقوم کونجات مل سکے۔