تولیہ کے برآمدی کنسائمنٹ میں اربوں کی ممنوعہ ادویات کی اسمگلنگ
کراچی (اسٹٓف رپورٹر) سیریلون افریقہ بھیجے جانے والے برآمدی سامان سے 2.8 ارب روپے کی 5.6 ملین ٹراماڈول گولیاں ضبط۔ تفصیلات کے مطابق کلکٹریٹ آف کسٹمز انفورسمنٹ کراچی نے برآمدی سامان کی آڑ میں کنٹرول سیکوٹروپک ٹراماڈول کی 56لاکھ (5.6 ملین)گولیاں افریقہ اسمگل کرنے کی ایک بڑی کوشش کو کامیابی سے ناکام بنایا ہے۔ ٹراماڈول ڈرگ ریگولیٹری اتھارٹی آف پاکستان کے تحت ایک کنٹرول شدہ سکون آور دوا ہے۔ اس دوا پر کئی ممالک میں پابندی ہے کیونکہ اس دوا میں نشہ آور مرکبات شامل کئے جاتے ہیں۔ اس دوا (ٹراماڈول)کی زیادہ مقدار سے نشہ حاصل کیا جاسکتا ہے۔ ٹراماڈول ٹیبلیٹس کو تولیہ کی ایک برآمدی کنسائمنٹ ظاہر کیا گیا تھا۔ٹراماڈول ٹیبلٹس کو مغربی افریقہ کے ملک سیریلون کے شہر فری ٹا¶ن برآمد کیا جا رہا تھا۔ برآمدی کنسائمنٹ کا گڈز ڈیکلریشن احمد ٹریڈنگ کی جانب سے فائل کیا گیا تھا۔ یہ برآمدی کنسائمنٹ این ایل سی کنٹینرز ٹرمنل کراچی سے گرین چینل کے تحت رسک مینجمنٹ سسٹم سے کلیئر ہو چکا تھا۔ ڈپٹی کلکٹر کسٹمز انفورسمنٹ رابیل کھوکر نے رسک پروفائلنگ سسٹم کی بنیاد پر اس برآمدی کنسائمنٹ کی نشاندہی کی اور ایڈیشنل کلکٹر کسٹمز انفورسمنٹ جناب باسط حسین کو آگاہ کیا۔ ایڈیشنل کلکٹر کسٹمز انفورسمنٹ باسط حسین نے کلکٹریٹ آف کسٹمز ایکسپورٹ کراچی سے کلیئر شدہ کنٹینر،کنسائمنٹ کو روکنے اور مزید تفصیلی جانچ کے احکامات جاری کئے۔ ڈپٹی کلکٹر کسٹمز انفورسمنٹ محترمہ رابیل کھوکھر کی سربراہی میں اینٹی اسمگلنگ اسکواڈ کے عملہ نے قاسم انٹرنیشنل کنٹینرٹرمنل پورٹ قاسم پر ایکسپورٹ کلکٹریٹ سے کلیئرشدہ کنٹینر کو بحری جہاز پر لوڈ ہونے سے پہلے روک کر اس کنٹینر کی اسکیننگ کی اور برآمدی سامان کی سو فیصد تفصیلی جانچ پڑتال کی،جس کے نتیجہ میں5.6 ملین (56 لاکھ) ٹراماڈول گولیاں برآمد ہوئیں جن کو اے ایس او کے عملہ نے اپنی تحویل میں لے کرضبط کیا۔ گڈز ڈیکلریشن میں ظاہر کردہ تولیہ کنٹینر میں نہیں پایا گیا۔ کسٹمز ایکٹ کی متعلقہ دفعات کے تحت مقدمہ درج کر مزید تفتیش اور ملزمان کی گرفتاری کی کوششیں کی جاری ہیں۔ ضبط شدہ ٹراماڈول ٹیبلیٹس کو گودام منتقل کردیا گیا جس کی مارکیٹ میں قیمت2.8 ارب روپے ہے، جوکہ رواں برس میں کلکٹریٹ آف کسٹمز انفورسمنٹ کراچی کی دوسری بڑی فارماسیوٹیکل ضبطگی ہے۔ اس سے قبل کلکٹریٹ آف کسٹمزانفورسمنٹ کراچی کے اینٹی اسمگلنگ آرگنائزیشن نے گزشتہ ماہ فروری 2025 میں 10 ارب روپے مالیت کی ٹراماڈول ٹیبلیٹس ضبط کی تھیں۔کلکٹر کسٹمز انفورسمنٹ جناب معین الدین وانی نے اس کامیاب کارروائی پراے ایس او کے عملہ کی کارکردگی کو سراہا۔
