وزیراعظم نے ایف بی آرکو155لگژری گاڑیوں کی خریداری سے روک دیا

اسلام آباد(اسٹاف رپورٹر)وزیر اعظم شہباز شریف نے فیڈرل بورڈ آف ریونیو کو 155 لگژری گاڑیوں کی خریداری سے روک دیا کیونکہ ورلڈ بینک بھی 1.6 ارب روپے کی لاگت سے 13 درجن گاڑیاں خریدنے کے اقدام سے حیران تھا۔ وزیراعظم نے فوری طور پر ایف بی آر کے چیئرمین کو اس منصوبے کو آگے بڑھانے سے روک دیا۔ذرائع کے مطابق وزیر اعظم نے جمعرات کو ہدایت کی کہ ایف بی آر کو لگژری گاڑیوں کی خریداری کی منظوری کے لیے پری سینٹرل ڈویلپمنٹ ورکنگ پارٹی کے اجلاس میں کاغذات پیش نہیں کرنے چاہئے۔وزارت منصوبہ بندی نے پری سی ڈی ڈبلیو پی اجلاس بلایا تھا جس میں ورلڈ بینک کے 400 ملین ڈالر کے پاکستان ریوز ریونیو پراجیکٹ کے تحت مجموعی سرمایہ کاری پراجیکٹ فنانسنگ (آئی پی ایف) کے 19.6 بلین روپے کے اجزاءپر تبادلہ خیال کیا گیا تھا۔گزشتہ 10 دنوں میں یہ دوسری بار ہے جب وزیر اعظم یا وزیر خزانہ نے ایف بی آر کے معاملات میں مداخلت کی ہے تاکہ انتظامیہ کو کسی قسم کی بے ضابطگی سے روکا جا سکے۔ اس سے قبل وزیر خزانہ نے ایف بی آر کو ٹیکس دہندگان کی رقم کو اپنے ایگزیکٹوز کے ذاتی فائدے کے لیے استعمال کرنے سے روک دیا تھا۔وزیر اعظم کی مداخلت کے بعد، وزارت منصوبہ بندی نے پری سی ڈی ڈبلیو پی ہڈل کو منسوخ کر دیا۔وزیراعظم اب اس معاملے کا فیصلہ وزیر خزانہ اسحاق ڈار کی مشاورت سے کریں گے۔شہباز شریف نے چیئرمین ایف بی آر سے ان کی ہدایات کی خلاف ورزی کرتے ہوئے گاڑیاں خریدنے کی تجویز کے بارے میں بھی رپورٹ طلب کر لی ہے تاکہ ڈیفالٹ کے زیادہ خطرے کی وجہ سے کفایت شعاری کو یقینی بنایا جا سکے۔ایسا لگتا ہے کہ ورلڈ بینک کو بھی ایف بی آر کے اس اقدام کا علم نہیں تھا۔ذرائع کے مطابق ورلڈ بینک نے ایف بی آر کے ساتھ اس کوشش کے حصے کے طور پر 25 موبائل فیلڈ آفس وینز کے پائلٹ کی مالی اعانت کے امکان پر تبادلہ خیال کیا ہے۔ذائع کے مطابق ورلڈ بینک ایف بی آر کو ٹیکس کی تعمیل کو بڑھانے کے لیے کئی جدید اقدامات کے ساتھ مدد فراہم کر رہا ہے۔وزارت منصوبہ بندی میں جمع کرائے گئے پلان میں گاڑیوں کی نوعیت پر خاموشی تھی اور 155 گاڑیوں کی خریداری کا جواز پیش کرنے کے لیے کوئی کاروباری کیس بھی پیش نہیں کیا گیا۔گاڑیوں کی خریداری کے لیے 1.63 بلین روپے کی تخمینہ لاگت 8.6 فیصد فنڈز کے برابر ہے جو ایف بی آر نے اپنے فرسودہ ہارڈویئر اور سافٹ ویئر کو اپ گریڈ کرنے کے لیے حاصل کیے تھے، سرکاری دستاویزات سے ظاہر ہوتا ہے۔یہ 1,500سی سی سے 3,000سی سی تک کی گاڑیاں خریدنا چاہتا تھا – انجن کی صلاحیت جسے خودایف بی آر نے لگژری قرار دیا تھا اور ان پر بھاری ٹیکس عائد تھا۔ اس نے دستاویزات میں گاڑیوں کی ساخت کی وضاحت نہیں کی ہے۔ذرائع کا کہنا ہے کہ ٹیکس دہندگان کی دہلیز پر جا کر ان کا پیچھا کرنا ایک پرانا تصور ہے اور اس کے بجائے ایف بی آر کو اپنی خدمات کو بہتر کرنا چاہیے۔ سینئر سرکاری حکام کے مطابق، پاکستان میں 120 ملین اسمارٹ فونز کے ساتھ، ایک جامع ایپلی کیشن یہ تمام خدمات انگلی کے اشارے پر دے سکتی ہے۔ورلڈ بینک کی مالی اعانت سے چلنے والے اس منصوبے کا اصل تصور ڈیجیٹل ایف بی آر بنانا تھا۔